出圖之前一定要睇一次文案：ContentMaMa 點解要多加一步
好多人第一次用 ContentMaMa 都會問同一句： 「點解唔可以一撳就成套出晒？」答案好簡單——因為出圖係成條流程入面最貴嗰步， 而文案階段執一隻字係免費嘅。
懶人包
- 文案生成 1 粒 token；出圖係每頁 3 粒（慳位模式 1 粒）。
- 即係話一套十頁，文案佔 1 粒，圖佔 30 粒——成本 97% 喺出圖度。
- approve 之前改字唔會扣 token，改完先出圖等於慳返成套重做嘅錢。
- approve 前 check 六樣：第一頁、事實、用詞、每頁一個重點、最後一頁 CTA、字數。
- 出咗嘅圖保存 30 日，記得即刻下載。
條數係點計嘅
ContentMaMa 一粒 token 對應一次生成動作。價錢表擺咗喺收費頁， 但流程入面嘅分佈值得攤開嚟講：
| 步驟 | Token | 備註 |
|---|---|---|
| 同 MaMa 傾（開稿前） | 1 粒 | 成段對話計一次，唔係逐句計 |
| 文案生成 | 1 粒 | 成套十頁嘅文字一次過出 |
| 喺 review 度自己改字 | 0 粒 | 改幾多次都唔會再扣 |
| 出圖（標準） | 3 粒／頁 | 十頁 = 30 粒 |
| 出圖（慳位） | 1 粒／頁 | 十頁 = 10 粒，畫質低啲 |
睇到問題喺邊未？一套十頁標準畫質，總共 31 粒，其中 30 粒喺出圖。 如果你出完先發覺第一頁寫得唔掂、或者成篇語氣唔啱，重出就係再燒多 30 粒。
換句話講：approve 呢一步唔係為咗慢，係為咗唔好燒錯錢。
要講清楚一樣嘢：文案嗰 1 粒係開稿嗰陣就扣咗嘅，就算你最後唔 approve、 唔出圖，嗰粒都唔會退返。所以「試吓佢寫成點」呢個動作本身有成本—— 但相比起出完圖先發覺要重來，1 粒同 30 粒係兩回事。
設計上其實可以做到「一撳出晒」，我哋試過。 但測試嗰陣最常見嘅情況係：用家見到成套圖出咗，先至發現文案要改， 然後成套重出。慳返嗰三十秒，換嚟三十粒 token。
Approve 之前，check 呢六樣
呢個清單唔止適用於 ContentMaMa——你用任何 AI 工具做輪播貼文都用得著。
- 第一頁企唔企得住。有冇畀理由人哋停低？答唔到「唔睇會蝕咩」， 就返去改。呢步佔咗成個 post 一半嘅成敗，詳情見 第一頁點寫嗰篇。
- 有冇作嘢。數字、日期、價錢、法規、對方公司名—— AI 講得好肯定唔代表啱。呢啲你一定要自己核，冇捷徑。
- 用詞係咪香港人講嘅。「視頻」「質量」「網路」「行銷」呢類字掃一次。 我哋喺生成階段已經擋咗大部分，但仍然值得自己過一次目—— 對照表喺呢篇。
- 每頁淨係講一件事。一頁塞兩個重點，出咗圖就會擠到冇位放， 到時要改就已經燒咗 token。
- 最後一頁有冇明確動作。follow、save、留言、去 bio——揀一個，唔好三個一齊。
- 字數啱唔啱一頁位。一頁 30 至 45 個中文字最舒服。 文案階段睇落 OK，出咗圖先發現字細到睇唔到，係最常見嘅重做原因。
幾件配套上要知嘅事
圖只保存 30 日
出咗嘅圖會喺 30 日後自動刪除。呢個係我哋喺條款同私隱政策入面都有寫明嘅安排， 唔係 bug。做法好簡單：出完即刻下載，唔好當佢係圖庫。
冇排期，冇自動出 post
ContentMaMa 做到出圖為止。之後你自己下載、自己揀時間出。 我哋暫時冇接 Instagram 發佈，亦冇排期功能——講明好過畀你用到一半先發現。
一張參考圖就定到風格
唔使 brand kit，上傳一張參考圖，系統會用第一頁做 anchor 令成套十頁風格連貫。 想試風格，用慳位模式行一次先，啱咗再用標準畫質出正式版—— 十頁慳位得 10 粒，比直接標準出平三分二。
常見問題
改文案會唔會扣 token？
改字本身唔會，扣 token 嘅係重新生成。文案生成一次 1 粒，出圖每頁 3 粒（慳位模式 1 粒）， 所以喺 approve 之前執到啱，係最抵嘅做法。
出咗圖之後想改一頁，使唔使成套重出？
唔使，可以淨係重出嗰一頁。但每重出一頁就再計一次出圖成本， 所以文案階段執啱始終最平。
出咗嘅圖會保存幾耐？
出咗嘅圖會保存 30 日，之後會自動刪除。出完記得即刻下載一份返自己電腦或者雲端。
啲數邊度嚟？ 表入面 1／1／3／1 呢幾個 Token 數，直接嚟自 ContentMaMa 系統嘅收費設定， 同收費頁同一個來源，2026 年 8 月 6 日核對過。 「圖保存 30 日」寫咗喺條款第 12 條同 私隱政策第 6 條。價錢改咗，呢篇文會一齊改。
← 返回 Blog